XOVES 20 DE XUÑO, CONFERENCIA DO ARQUEÓLOGO ÁNGEL CONCHEIRO: “CASTRO DAS BARREIRAS, VIMIANZO. NA FISTERRA DOS CASTREXOS ATLÁNTICOS”


O xoves 20 de xuño, ás 20 horas en Portas Ártabras (Sinagoga, 22 – A Coruña) terá lugar a conferencia impartida polo arqueólogo Ángel Concheiro titulada: “CASTRO DAS BARREIRAS, VIMIANZO. NA FISTERRA DOS CASTREXOS ATLÁNTICOS”.

O castro das Barreiras, sitúase na parroquia de San Xoán de Cambeda, no concello de Vimianzo, capital da Terra de Soneira e centro da Costa da Morte. A súa localización, na contorna urbana de Vimianzo e á beira mesma da transitada estrada A Coruña – Fisterra, así como a singularidade de ser un castro de chaira, a súas orixes en plena Idade do Ferro e construccións, como achados, fan del un dos xacementos máis atractivos de Galicia e convérteo nun recurso cultural e turístico de primeira orde.

Pero as súas singularidades van máis aló: dende o punto de vista arqueolóxico, tanto a súa localización atípica, en plena chaira e dominando a paisaxe cóncava do val de Vimianzo, como a espectacularidade do sistema defensivo, cun ancho foso seguido dun complexo terraplén, muralla que chega a superar os 10m de altura nalgunha zona, fan del un xacemento de sumo interese para a investigación e a difusión social da cultura galaica.

Despois de varias sondaxes, as escavacións arqueolóxicas retomáronse no ano 2018, coa apertura dunha área na que hoxe se poden observar os restos de catro construcións domésticas e outros muros de difícil adscrición funcional, así como moitos buratos de poste e estruturas negativas. Segundo o director destas campañas, Ángel Concheiro, o conxunto material recuperado, no que sobrancea a cerámica indíxena, indica, polo momento, unha cronoloxía da IIª Idade do Ferro e Época Galaico Romana, seguramente entre os séculos II a.C. e II d.C.