Actividades


Actividades

AMIGOS DOS MUSEOS DE GALICIA

PROGRAMA DE ACTIVIDADES 2024

OS MUSEOS: A REIVINDICACIÓN DO HUMANISMO NA ERA DOS ROBOTS

Si no século XIX foi a revolución industrial a que supuxo tantas mudas nas relacións humanas, neste noso século XXI acontece unha nova revolución, a das novas tecnoloxías. Sedutora innovación protagonizada por robots, pola intelixencia artificial (IA) a través de pantallas que coutan os sentidos. Enxergamos que a realidade supera á ficción. De dominar pasamos a ser dominados pola máquina.

Revolucións, experimentos coa súa parte positiva en canto supoñen avances para as relacións, a información, a medicina, a ciencia… en fin para a comodidade e o desenvolvemento da persoa e da sociedade. Aínda que tamén avances cos seus perigos, cando o valor de uso se fai arma de consumo, de dominio e acoso, incidindo na liberdade, nas culturas, desembocando na uniformación. Globalización perversa e abusiva da idea de democracia e da liberdade, onde parece que todo vale: a competitividade, os enganos, os timos…

Pantallas nas rúas, diante da cama, do sofá, da mesa, nas mans… plasmas que nos informan ou deforman, onde uns poucos programan para que os demais se fagan adictos consumidores: metamorfose, utilización do ser humano como mercancía de supermercado. Entón o herdo espiritual, o que singulariza, entra en crise.

Asumimos a cuestión: defendemos a liberdade cos seus lindeiros, a creatividade, os valores da persoa fronte ao campante totalitarismo tecnolóxico. Defendemos os valores culturais, a permanente revisión do pasado dende as novas perspectivas, aprendendo dos erros que tentan contra a persoa, contra a sociedade e a natureza que nos soporta. Fuximos pois dos tópicos, dos retrousos, da masificación, divulgando que non vulgarizando, tendencia, tan proclive en Galiza: o esperpento, o grotesco, como a ampla gama de hiperenxebrismos, entre tantos feismos que non son máis que efectos con causa na aculturación.

Este é pois un colectivo que asume a singularidade de cada ser humano, como actor e autor da súa historia, mais que como espectador. Partimos pois e movémonos no humanismo. Pois velaí a nosa lección, a lección dos museos, continentes e contidos sobre os que saber aplicar os sentidos, a sensibilidade.

ANOTARSE NAS XEIRAS OU ACTIVIDADES

Os condicionantes de axencia, infraestrutura (transporte, hoteis), concertar visitas excepcionais, esixen certa coordinación e compromiso, polo que agradecemos inmensamente que @s interesad@s deixen constancia do seu interese cunha antelación que permita programar a actividade co éxito que se merece.


2024 AMIGOS DOS MUSEOS DE GALICIA 2024 PROGRAMA DE ACTIVIDADES

XANEIRO

* Mes de inicio do ano que sirve para reorganizar aspectos de programación.

* 29 luns: Presentación Programa 2024.

FEBREIRO

*  11 domingo: Xeira de Aventura en relación co Entroido Tradicional.

* 25 domingo: Xeira polo Ribeiro das Mimosas. Barbantiño e Trasalba.

* 26 luns: Asemblea anual de socios.

MARZO

* 10 domingo: Xeira con Allariz ao completo e Ambía.

* A mediados de mes: Cursiño “Como se visita un Museo”. Introdución aos museos.

* En data e tarde que se fixará, visita guiada á exposición de Antonio Palacios.

ABRIL

* 1 luns: “Día das Artes de Galicia”, dedicado ao escultor Asorey.

* 14 domingo: Xeira intensa a través do Románico das Terras do Deza.

* 18 xoves: Celebración do “Día Internacional dos Monumentos e os Sitios”.

* 28 domingo:  Xeira por Arousa, Illa, Vilaxoán, Pazo de Fefiñáns…

MAIO

* 12 domingo: Viaxe a través da Arqueoloxía das Médulas e do Bierzo.

* 17 venres: “Día das Letras Galegas” dedicado a Luisa Villalta.

* 18 sábado: Día Internacional dos Museos18 de Maio. Acto en “Portas Ártabras” e no que se dará a coñecer o “Premio Pedra do Destino 2024”.

* 26 domingo: Xeira ao Couto Mixto, entre a Limia e Tras os Montes.

* En data que se fixará, farase unha visita á Escola de Canteiros de Poio.

 XUÑO

* 9 domingo: Viaxe a Grandas de Salime (Asturias). Arqueoloxía i etnografía.

* Segunda Quincena: Viaxe antolóxico polos Balcáns (Bulgaria, Serbia, Bosnia, Croacia… (Ver programa especial e inscribirse en Ciberviaxes. Rúa Menéndez Pelayo / 12 Coruña, 15005 tfn.-981216600)

* En data e tarde que se fixará, farase unha visita completa a Oza dos Rios.

XULLO

* 14 domingo: Xeira á Ribeira Sacra do Miño, Chantada.

* 28 domingo:  Xeira a terras do Minho, Melgaço e A Peneda.

* En data e tarde que se fixará, farase unha visita aos Castelos de Narahío e Moeche.

AGOSTO

* 11 domingo: Xeira a Terras ourensáns da Veiga, O Bolo e as Hermitas.

* 25 domingo: Xeira a Celanova e Bande.

* En tarde que se fixará, farase unha visita ao entorno histórico de Compostela.

SETEMBRO

* 8 domingo: Tradicional xeira ao Courel de Novoneyra.

* Última Semana: Viaxe especial a Istambul, (Ver programa especial e inscribirse en Ciberviaxes. Rúa Menéndez Pelayo / 12 Coruña, 15005 tfn.-981216600)

* En data e tarde que se fixará, farase unha visita a Pontedeume e Breamo.

OUTUBRO

* 6 domingo: Xeira polo Mar de Pontevedra, Combarro e Illa de Tambo, a Lanzada…

* 27 domingo: Xeira a Monforte e a súa Ribeira Sacra.

* En tarde que se anuncie, visita guiada da cidade vella de A Coruña.

NOVEMBRO

* 10 domingo: Xeira a Viveiro, o seu entorno e Sargadelos.

* 16 sábado: “Día Mundial do Patrimonio Cultural”.

* Segunda quincena: Viaxe antolóxico a Arxentina con dedicación a Bos Aires e á presencia galega. (Ver programa especial e inscribirse en Ciberviaxes. Rúa Menéndez Pelayo / 12 Coruña, 15005 tfn.-981216600)

* En tarde que se anuncie, farase unha visita ao Museo do Pobo Galego. (Compostela)

 DECEMBRO

* 15 domingo: Xeira ao Ribeiro de Leiro e Pena Corneira.

* 19 xoves: Despedida de Ano en “Portas Ártabras”.


Viaxes longas previstas para o futuro. Mesmo pódense propoñer outras. Trátase de itinerarios  de “deseño”, fora dos programas convencionais. Ante todo tendo moi presente a seguridade, como a realización da totalidade do programa:

*Primavera: A Europa céltica (Suíza, Austria..) // Escocia // Sicilia, Sur de Italia // Malta

*Outono: Chicago, ruta 66 // Perú // Cuba

* Cidades:  Berlín // Hamburgo // Valencia // Cordoba // Huelva…

* Entre outras xeiras, que incluso poden repetirse con grupos minoritarios, engadirse  ou substituír algunha das programadas, sempre en función da seguridade e éxito …


RESUME DE PROGRAMAS PROPOSTOS QUE SE IRAN CONCRETANDO:

COÑECER, QUERER E DEFENDER O PATRIMONIO CULTURAL

Este é un programa inacabado. Da propia dinámica improvisaranse  e nacerán outras actividades.  As “Portas Ártabras” están abertas a recibir e informar.

COÑECER GALICIA”

Viaxar de xeito colectivo é algo máis que aprender, é convivir, compartir o que os seres humanos fixemos e desfixemos ao longo da historia: arqueoloxía, arte, etnografía, paisaxe… Deste xeito, a institución do museo proxéctase  máis alá do seu continente e das vitrinas ao  verdadeiro escenario do acontecer cotián. Roteiros estudados para cada estación do ano, onde sempre haberá algo novo por sentir.

COÑECE A TÚA CIDADE

A cidade define aos seus habitantes, verdadeiro museo de actores, onde todo comunica a quen sensiblemente se achega a preguntarlle. Son xeiras explicadas polas propias rúas da cidade, as súas institucións, monumentos e empresas.

“COÑECE OS TEUS MUSEOS”

Hai algo máis que o continente dun museo e que o mesmo contido, formado por obras de arte, por artefactos, curiosidades e explicacións. A institución do museo é un xeito científico de conservar, documentar, estudar, divulgar ou sensibilizar, algo ao que achegarse, a fin de implicarse con canto significa e dignifica a cultura.

PORTAS ABERTAS A OUTROS COLECTIVOS

O noso espazo de cultura está aberto a todos os colectivos que ansían sensibilizar sobre a inmensidade cultural, máis aínda cando coa crise se pechan e limitan espazos para o encontro. Os martes son días dedicados a estes colectivos.

“LUNS DE PROXECCIÓNS DE ARTE

Proxeccións de documentais e audiovisuais de autoría propia que introducen a diferentes aspectos da Historia, a Arte, a Etnografía….

“XOVES DE VIAXES”

Un día de cada semana pra presentación de itinerarios ou pra compartir experiencias vividas: proxeccións, fotos, intervencións…

“SEGUNDO XOVES DE MES”: SIMBOLISMO

O enxeñeiro e especialista en simboloxía medieval Xosé Luís García Dornelas, cada segundo xoves de mes, axudado de imaxes, introduce á linguaxe dos símbolos.

CICLO “COMO SE VISITA UN MUSEO

Cursiño anual dirixido especialmente a pedagogos, estudantes de turismo, animadores culturais, co ánimo de iniciar sobre as posibilidades didácticas e limitacións que ofrece a institución do museo. Experimentando xeitos de interpretar a cidade e o medio como un museo activo que tanto define aos cidadáns de onte, como aos de hoxe. Repaso do estado da cuestión dos museos galegos.

TERTULIAS, CONFERENCIAS, CURSOS

Seminarios feitos de xeito teórico-práctico coa ansia de sensibilizar encol do valor cultural das creacións e os camiños da Arte, Arqueoloxía, Historia, Etnografía…

1 DE ABRIL: “DÍA DAS ARTES DE GALICIA”

En conmemoración da mesma data do ano 1188 no que se erguen os linteis do Pórtico da Gloria, baixo a dirección do Mestre Mateo e segundo consta labrado nos mesmos. Nestes 2020 / 2021, dedicado pola Academia G. de B. Artes ao arquitecto barroco Domingo de Andrade.

18 DE ABRIL: “DÍA INTERNACIONAL DOS  MONUMENTOS E DOS SITIOS ”

Celebración da xornada para coñecer o estado da cuestión sobre o patrimonio cultural como escenario da “memoria colectiva” e como recurso.

18 DE MAIO: “DÍA INTERNACIONAL DOS MUSEOS

Celebración dedicada a espallar a significación do museo na educación e na cultura.  Xornada na que se da a coñecer o “PREMIO PEDRA DO DESTINO” á conservación e difusión do patrimonio cultural.

16 DE NOVEMBRO: “DÍA DO PATRIMONIO MUNDIAL”

Xornada pra unha reflexión sobre o estado da cuestión e rendibilidade do patrimonio cultural máis significativo

 CONCURSO FOTOGRÁFICO “OBXECTIVO DA MEMORIA

O tema é o estado da cuestión do Patrimonio Cultural de Galicia. Bases na web.

_________________________________________________________________________________________________________

Dende “Portas Ártabras”, seguimos a renovar ese espírito humanista. O noso espazo de cultura na Cidade Vella coruñesa ven a ser como a renovación daquela romántica “Cova Céltica” coruñesa ou daquela taberna ourensá de “O Volter”, onde patriarcas e humanistas da Galiza conversaban cos mozos e falaban do divino e do humano, queremos dicir de asuntos tan teosóficos, máxicos, como terreais, os relativos á liberdade fronte á opresión, abandeirando sempre un principio de igualdade e de humanismo: o de endexamais á explotación dun ser humano por outro… Asumimos ese papel de igualdade e tolerancia, melloramos entón dende aquela sociedade patriarcal.

Pois así é que dende este noso espazo de encontro – tras do camarín da Virxe da Estrela, un mito con fondas raiceiras mariñeiras, venusianas – abrímonos aos camiños do mundo a través das xeiras por Galiza, como por outras partes do mundo.

Respecto ao pasado aceléranse máis as mudas, motivadas polas novas tecnoloxías, por novos retos enerxéticos, polo consumismo, pola globalidade, mesmo polas pandemias, todo o que nos obriga a virar conductas, a buscar solucións a través da cultura, da responsabilidade individual e colectiva: a solución está nunha educación, a todas horas e en todos os ambientes.

Así é que velaquí seguimos, dispostos a ofrecer positividade, optimismo, crenza no ser humano para convivir en alegría, para compartir saber e un noso mundo para coñecelo, querelo e defendelo, como vimos dicindo dende sempre.